Meeqqat atuarfianit qaffasinnerusunik ilinniarnernik naammassinnissimasut
2015-ip naanerani inuit 4.832-t ingerlariaqqiffiusumik qaffasinnerpaatut ilinniagaqarsimapput. Innuttaasut 16-it sinnerlugit ukiulinni procentinngorlugu annertussusaat 11,3 pct.-iuvoq tamanna ukiut qulit ingerlanerini 2 procentpointinik qaffariarneruvoq. Ukiumi pineqartumi inuit katillugit 10.909-t ilinniarnertuunngorniarfinni, inuussutissarsiornermi ilinniarfinni imaluunniit qaffassarluni pikkorissarnernik qaffasinnerpaamik ilinniagaqarsimapput. Innuttaasut 16-it sinnerlugit ukiulinni procentinngorlugu annertussusaat 25,6-iuvoq, tamanna ukiut qulit ingerlanerini 4,2 procentpointinik qaffariarneruvoq.
Titartakkap 1-ip takutippaa agguaqatigiissitsinnermi arnat ingerlariaqqiffiusumik ilinniarsimasut ukiuni kingullerni amerleriarsimasut, 2015-imilu 56,7 pct.-inik annertussuseqarsimasut. Ukiut qulit matuma siorna suiaassutsit akornanni naligiimmik agguataarsimapput. Arnat professionsbacheloritut ilinniarsimasut amerlanerit peqqinnissami atugarissaarnermi aammalu ilinniartitsisutut ilinniagaqarsimasarput. Angutit aamma professionsbacheloritut ilinniarsimagaangamik amerlanerit ilinniartitsisutut ilinniarsimasarput. Aammattaaq angutit illuliassanik titartaasartutut illuliortaatsimik aammalu sanaartornermik taamatullu ingeniøritut aammalu teknikkimik ilinniagaqarsimapput, ingerlariaqqiffiusumillu inuussutissarsiornermi ilinniarfinni sivikinnerusuni, ilaatigut inuussutissarsiornermi allaffissornermilu aamma ilinniarsimallutik.
Ingerlariaqqiffiusumik ilinniarfinni ilinniarsimasut professionsbacheloritut ilinniarsimasut 2.496-iullutik amerlanerpaapput. Bacheloritut ilinniarsimasut 293-iupput, ukiut qulit ingerlanerini marloriaatinngorsimallutik.
Titartagaq 1. innuttaasuni meeqqat atuarfiannit qaffasinnerusumik ilinniakkanik naammassinnissimasut ukiup naalernerani naatsorsukkat amerlassusaat, suiaassuseq aammalu ukioq malillugit agguaanneri
Nalunaarut: Ilinniarnertuunngorniarluni inuussutissarsiornermilu ilinniarnerni aamma qaffassarluni ilinniarnerit ilaapput.
Najoqqutaq: Naatsorsueqqissaartarfik – Kisitsisaataasivimmi kiksitsisit (http://bank.stat.gl/UDNISCPROB).